رواية ماجدولين او تحت ظلال الزيزفون

رواية تحت ظلال الزيزفون قام بالترجمة ديالها مصطفى لطفي المنفلوطي، اللي على ما يُشاع انه ماعمرو قرا الفرنسية، وهي اللغة الاصلية للرواية، ولكن قدر يترجمها طبقا للمعلومات اللي تعطات ليه من الزملاء ديالو وقدر ياخد الاحداث الرئيسية ديال القصة ويصيغهوم بالاسلوب ديالو.

الرواية هي عبارة عن قصة حب بين ستيڢن اللي كان من عائلة غنية فالمانيا ولكن قرر يهجر العائلة ديالو باش يحقق الحلم ديالو فاحتراف الموسيقى، الشي اللي خلاه يتلاقا بماجدولين اللي كان كاري عندهوم بيت فالدار ديالهوم.

فالاول كان ستيڢن قريب من اب ماجدولين وكان كايشكرو ليها بزاف، ولكن من بعد ماعرف باللي تقرب ليه من بنتو وناويين يتزوجو قرر يجري عليه، حيث ماعندوش عمل قار اللي يقدر يعيش بيه ماجدولين.

قبل الرحيل ديالو واعداتو ماجدولين باللي راه غاتبقا تسناه حتى يوقف على رجليه، الشي اللي ماقدراتش توفي بيه مع ظغوطات المحيط ديالها، اللي كانو كايقولو ليها باللي المهيم فالعلاقة والرجل هو الفلوس ديالو والمكانة الاجاتماعية اللي غايعيشك فيه وماشي دوك الخزعبيلات ديال القلب ديالو حنين وداكشي...

فالوقت اللي ماجدولين بدات كاتدير علاقة مع فرد من عائلة الصديقة ديالها اللي هو فالاصل الصديق د ستيڢن وفايت وقف معاه ستيڢن فوقت المحنة، واحد من الاقارب ديال ستيڢن كان فايامو الاخيرة ودار وصية باش الاملاك ديالو كامللها تولي فملكية ستيڢن.

غايمشي ستيڢن ويشري الدار اللي كانو كايحلمو بيها ويصاوبها على المواصفات اللي كانو كايتمناو، وفاش غايبغي يمشي يعلم ماجدوللين بالخبر غايلقاها فنهار زواجها بالصديق ديالو اللي خانو، ومن تم غادي يتصدم وغايعيش ايام صعيبة، حتا لواحد نهار اللي غايفيق فيه ويرجع يعمر وقتو بالموسيقى، ومن تم غايولي مشهور فالمانيا، وغايبدا يحضر لجميع الحفلات الكبيرة فالبلاد وغايولي مشهور.

حتى للنهار اللي ماجدولين غايسمح فيها راجلها وغايفقدو جميع الاملاك ديالهوم بسبب القمر ديال راجلها، وغادي ترجع ببنتها وغاتطلب من ستيڢن يعاونها، اللي ماغايبخلش عليها وغايعطيها فين تسكن و باش تعيش، ولكن فنفس لوقت ماقدرش يسامحها على الخيانة ديالها، هاد الذنب اللي غايخليها تنتاحر فالواد.

وبعدها بايام قليلة ستيڢن حتى هو غايموت بكثرة الهم والتفكير باللي هو المذنب فانتحار حب حياته.