نيلسون مانديلا

نيلسون مانديلا

تزاد ف 1918 الطفولة ديالو كانت صعيبة من بعدما رفض الاب ديالو الخضوع لامير ابيض، تحيدات ليه جميع الاملاك ديالو وخرجوه من القرية ديالو، واتجهو لقرية اخرى فيها بعض اصدقاء الام ديالو اللي بقاو مساعدينهوم حتى توفى الاب ديالو، وتما مانديلا تبناه واحد السلطان، اللي وفر ليه كاع الحاجيات ديالو وكان كايقريه وكايوجدو باش يكون المستشار ديال ولدو اللي غايورثو فالحكم...

 ف سطاش لعام الفتيان عندهوم كايدوزو من مرحلة الطفولة لمرحلة الرجولة وباش يدوزو هاد السطاج كايخصهوم يتختنو..

ف 211 عام من بعد ما السلطان حس براسو قرب يموت قرر يزوج الابن ديالو و مانديلا، ولكن بجوجهوم رفضو الدريات اللي هو ختار ليهوم وكانو رافضين فكرة الزواج قبل مايساليو قرايتهوم وايضا شي واحد يختار ليهوم الزوجة ديالهوم وهادشي اللي خلاهوم يهربو ف اتجاه جوهانسبورغ..

 في جوهانسبورغ غايعانيو فالاول من التبعات ديال انهم من عائلة السلطان، اللي غايوصي معارفو باش مايعاونوهومش و يرجعوهوم ليه، ولكن العناد ديالهوم كان اكبر، الشيء اللي غايخلي مانديلا يتلاقا بواحد رجل اعمال سميتو وولتر سيسولو، اللي غايعاونو باش يلقا عمل ف مكتب للمحاماة عند المحامي لازار سيديلسكي وهو ابيض البشرة ويقدر يكمل قرايتو فالجامعة باش ياخد الليصانص ويولي محامي مستقبلا...

 فهاد المكتب غايقدر مانديلا يتعرف على السياسة اكثر بالفضل ديال واحد الشخص اسود سميتو 'غور ' اللي كان عضو ف حزب المؤتمر الوطني الافريقي واللي كايرجع ليه الفضل الكبير على نيلسون باش يدخل للحزب وباش ايضا يولي محامي، ف اواخر سنة 1943 غادي يتحصل مانديلا على شهادة الليسانس فالادب، وغايقدر يتعتمد فالمكتب اللي كان خدام فيه ك محامي...

 مانديلا غادي يتزوج من المرا الاولى ديالو اللي غايولد معاها جوج ولاد و بنت غادي تموت فاش تولي عندها تسع شهور بسبب مرض ماعرفوهش، كان ماكايشوفش ولادو بسبب التزاماتو فالعمل و العمل النضالي فالحزب كايجب فالليل متاخر و كايخرج بكري، كايلقا ولادو ناعسين و كايخليهوم ناعسين، لدرجة واحد النخار الابن ديالو سول مو قال ليها الواليد فين كايسكن؟

 من بعد التضييقات من الحكومة على الأفارقة قرر الحزب بتعاون مع حزب شيوعي و حزب الهنود باش يديرو حملة لخرق القوانين و يشدهوم البوليس فالحبس باش يديرو ضجة و انهم قادرين يتحداو، فعلا الحملة لقات اقبال كبير واستمرت اكثر من ما كان مخطط، و بسبب هاد الحملة تسجن مانديلا جوج مرات ولكن غير لايام قليلة. ..

ف سنة 19522 استطع يدير مكتب خاص به هو والشريك ديالو تامبو وسماو المكتب ب ' مانديلا و تامبو '

 من اول يوم لافتتاح المكتب والناس كاتجي عندهوم باش يرافعو عليهوم فالمحكمة اللي كان من الغريب فيها يكون محامي اسود، رغم انه ربح اغلب الدعاوي الا انهم مابغاوش يطلعوه لهيئة القضاة لكونه افريقي و تعرض لبزاف د الابتزازات فالعمل ديالو ف 1954 قررو يشطبو عليه فقائمة المحامين بسبب الانتماأت السياسية ديالو، ولكن دافعو عليه صحابو فالمهنة، البيض قبل السود، وحكم القاضي لصالحو باش يكمل مزاولة المهنة ديالو

فسنة 19566 غادي تلقي عليهوم حكومة البيض القبض هو و جميع اعضاء الحزب اللي معاه بتهمة الخيانة العظمى، وتهديدهم لاستقرار البلاد بتحريض السود على الثورة والعنف، وان الحزب الشيوعي هو اللي مسير ليهوم الحزب، كانو تشدو فسجن لمدة 15 يوم للتحقيق، هاد المدة كانت فصال الحزب اكثر ماكانت فصالح الحكومة حيت اغلب اعضاء الحزب كان عليهوم الحظر وممنوعين من الحضور فالاجتماعات العامة او مغادرة المدينة او الحضور فمقر الحزب، السبب اللي كان خلوهوم لمدة وهوما مامتاصلينش مع بعضهوم.

 وهاد المدة ايضا خلات الاعضاء الجدد والشباب يتحاكوو مع القدامى ويديرو استراتييجية جديدة للعمل

من بعد ف سنة 1959 غايتشدو فيهوم 299 واحد بنفس التهمة واستكمال المحاكمة، وغايدوزو 5 شهور فالحبس، وغياعطيوهوم سراح مؤقت، حتى ل سنة 1961 وغاتحكم المحكمة بالبراءة ديالهوم من التهم الموجهة ليهوم.

 من وراء المحاكمة كان مانديلا متأكد باللي الحكومة غادي تلفق ليه شي تهمة ويدخل للحبس، لذلك قرر انه يمارس العمل ديال فالحزب فالسر، وولا متخفي عن الانظار، ومابقاش ساكن مع ولادو، ديما عند شي واحد من الاصدقاء ديالو، وفعلا بعد مدة ولا مطارد من الشرطة ولكن ماستطعوش يعرفو المكان ديالو، كان كايخرج فهيئة ميكانيكي ولا جاردينيي،وفاغلب الاحيان كان كايخرج غير فالليل، فالنهار كاينعس وكايخصصو للقراأة، حتى لليوم فاش قرر انهم يبدلو السياسة ديالهوم من النضال السلمي الى النضال الحربي، وبعد سلسلة من الاجتماعات مع قادة الحزب باش يقنعهم، تم الاتفاق باش ياسسو جناح مستقل على الحزب وسماوه منظمة امخونتو وي سيزوى اللي كاتعني 'رمح الامة'، واول عمل ليها كان ف 16ديسمبر فيوم كايحتافلو فيه البيض بالفوز ديالهوم فحرب ضد السود، والعملية كانت تستهدف المنشآت الحكومية، وكانت معها رسائل على تأسيس منظمة رمح الامة..

 من بعد قرر الحزب ان يرسل مانديلا في رحلة خارج البلاد للقيام بجولة فمختلف الدول الافريقيا للتعريف بحزب المؤتمر الوطني الافريقي ونضاله، والتعريف ايضا بالمنظمة الحربية الجديدة واستقطاب مساعدات مالية وتدريبية للمتطوعين، وفعلا كان لمانديلا ما اراد حيث جل الدول التي زارها ابدت اسعدادها الكامل للمساعدة ماديا ومعنويا، في هذه الرحلة كانت الرباط و وجدة ايضا من المدن التي زارها، ولكن كان بمعية اعضاء منظمة التحرير الجزائرية الذين كان مقرهم آنذاك في الرباط، وجنودهم يتدربون في وجدة (هادشي من التاريخ اللي ماقراوناش)

 بعدهاد الجولة الافريقية اللي جمع فيه المساعدات المادية والتدريبية من عند ادول اللي زار، غادي يرجع لجنوب افريقيا ولكن غايتلاقا مع مفاجأة غير سارة وغاتلقي عليه الشرطة القبض وغادي يتحكم ف سنة 1962 ب 5 سنين ديال الحبس، بتهمة الخروج من البلاد بدون رخصة وتحريض العمال على الاضراب وبعض الاعمال التخريبية، ولكن بعد عامين وفسنة 1964 غاي يتضافو ليه تهم اخرى وغايولي الحكم مؤبد.

 فالسجن غايقود مانديلا نضال آخر ماكايختلفش على النضال اللي كان كايقودو من قبل، النظام العنصري كان فجنوب افريقيا حتى فالسجون، الاكل الخاص بالبيض يختلف عن الافارقة وعن والملونين وكذلك اللباس والامتيازات الاخرى، بعد سنين من السجن فاواخر السبعينات غادي يظهر جيل جديد من المتمردين الشباب اللي غادي يديرو حملات تحدي كبيرة فمختلف بقاع جنوب افريقيا،و الشي اللي غايخلي اغلبهم يتلقا عليه اللقبض ويجي للسجن مع مانديلا، وغادي يكونو هادو اكثر تمردا منو وماغايقبلوش بالحالة اللي هو وصحابو كانو عايشينها من قبل فالسجن وغادي يقودو نضال من اجل تحسين وضعيتهم السجنية.

 فالتمانينات غادي تحاولو الحكومة تواعد مانديلا بامتيازات الى قرر يتخلى على النضال والحزب، ويتم اطلاق سراحه، ولكن مانديلا كان كايرفض جميع العروض، ومن بعد بدات الحكومة في مفاوضات معاه كممثل للحزب والشعب الاسود، وكان دائما متشبت بالمبادئ اللي بسبابها دخل للسجن ورفض اي تنازل على احد المطالب اللي كان الحزب كايطالب بيها، وبقا الحال على ماهو عليه حتى استقالة الرئيس بوتا وتعويضو بالرئيس 'دوكليرك ' اللي غايقود سلسلة من التغييرات فالقوانين العنصرية للبلاد، وكدا مفاوضات من مانديلا من اجل نبذ العنف وعودة السلام للبلاد.

في يوم 6 فبراير 199

0 غادي يعلن رسميا الرئيس دوكليرك امام البرلمان عن اطلاق سراح المعتقلين السياسيين فالبلاد ورفع الحظر على الاحزاب المعارضة والمنظمات المعارضة للقوانين العنصرية

فيوم 99 فبراير غادي يطلب الرئيس اللقاء بمانديلا، وغادي يقوليه انه غايخرج من السجن فاليوم الموالي، ولكن مانديلا غايرفض وغايطلب باش يخليو اسبوع آخر حتا يكون الحزب مستعد للخروج ديالو والاسرة ديالو كذلك، ولكن الحكومة رفضو الطلب ديالو بسبب انهم اعلمو الرأي العام الوطني والدولي ومايمكنش يزيدو يأجلو الخروج ديالو، من بعد غايتافقو باش يخرج يوم 11 فبراير.

 من الاشخاص اللي عاناو كثيرا مع نيلسون هوما الزوجات ديالو: ايفلين الزوجة الاولى لمانديلا كانت ممرضة، بعد سنين من الزواج عيات من التقصير ديالو فحق دارو وتخصيص كامل وقته للنضال، واشترطت عليه اما هي ولا النضال، واختار يكمل طريقو فالنضال وتطلقو، من بعد تعرف على ويني اللي غاتولي الزوجة التانية ديالو وكانت مساعدة اجتماعية وكانت حتى هي متمردة بطبعها وكانت كاتساندو فالقرارات ديالو وصبرات مع الغياب الكثير ديال على الدار، وعانت بزاف بعد الدخول ديالو للسجن من المضايقات ديال الشرطة ليها والحد من الحرية ديالها، وتشدات حتى هي بزاف دالمرات فالسجن بسبب النضال ديالها حتى هي ضد القوانين المجحفة، اللي بقات مقاومة معاه حتا الخروج ديالو من السجن، وبعد الخروج ديالو من السجن بداو كايختالفو بزاف وقررو يتطلقو ف ابريل سنة 1992، وللمعلومة هاد الزوجتين، فاغلب اوقات الحياة ديالهوم معاه كانو هوم اللي كايصرفو على الدار نظرا لالتزاماته بالنضال وكان كايتخلف على الاعمال ديالو.

 بعد الخروج ديالو من السجن غادي يدير مجموعة من المهرجانات الخطابية فجنوب افريقيا، وغادي يدي جولة لمجموعة من الدول الفريقية والاوربية وامريكا وكندا، للتعريف اكثر بالقضية الجوهرية للحزب اللي هي نبذ العنصرية والمطالبة بدستور جديد يحفظ كرامة وحقوق السود وحقهم فالترشح والتصويت فالانتخابات، هادشي كان بالموازات مع جلسات للمفواضات مع الحكومة اللي فغالب الاحيان كاتوصل للباب المسدود لكون الحكومة كاتفاوض مع مانديلا وماكاتوفيش بالاتفاق الاول اللي هو وقف العنف، بحيث ان الحكومة كانت كاتدعم حزب الحرية انكاتا، وكاتوفر ليه جميع الامكانيات باش يدير مجازر فحق المؤيدين لحزب المؤتمر الوطني الافريقي، وابعاد حزب.م.و.إ عن ساحة النزاع مع الحكومة وتوجيه كامل اهتماماته ف محاربة حزب الحرية انكاتا، ولكن مانديلا والاصدقاء ديالو كانو على علم بخطط الحكومة، وتعاملو برزانة مع الامور حتى وصلو لاتفاق بتشكيل جمعية مستقلة لاعادة الدستور، و تكوين حكومة تضم جميع الاحزاب اللي عندها اكثر من 5% من الاصوات، لتحكم مدة 5 سنوات

و تم الاتفاق على يوم27ابريل 19944 كيوم لاجراء اول انتخابات عامة غير عنصرية يشارك فيها السود والبيض، بعد انتهاء التصويت وفرز الاصوات، حصل حزب المؤتمر الوطني الافريقي على الرتبة الاولى بنسبة 62،6% من مجموع الاصوات، مما خول له تشكيل الحكومة يرأسها لاول مرة في تاريخ جنوب افريقيا رجل اسود وهو المناضل نيلسون مانديلا.